Папата Франциск беше погребан како градител на мостови и човек на милосрдие. Стотици илјади луѓе во Рим му оддадоа последна почит, меѓу кои и бројни шефови на држави и влади од целиот свет.
Околу 250.000 луѓе на плоштадот Свети Петар, како и шефови на држави и монарси од целиот свет, во Рим се простија од папата Франциск, кој почина во понеделникот на Велигден.
Уште во раните утрински часови луѓето се собраа во Ватикан за да присуствуваат на збогувањето. Присутна беше и политичката елита од повеќе од 150 земји, речиси сите кардинали и стотици бискупи.
Сеќавање на папата како градител на мостови
„Тој ги допре срцата на луѓето“, рече кардиналот Џовани Батиста Ре, кој го водеше повеќе од два часа долготрајниот реквием на плоштадот Свети Петар. Тој го опиша починатиот папа како човек со „голема човечка топлина и длабока чувствителност“. Тој потсети на Франциск како градител на мостови: „Изградете мостови, а не ѕидови“ е нешто што папата Фрањо често го повторуваше.
Батиста Ре, исто така, истакна бројни „гестови и апели на Папата во корист на бегалците и раселените лица“. Тој истакна дека е значајно што папата го направи своето прво патување токму на островот Лампедуза, кој стана симбол на „драмата на емиграцијата“.
„Соочен со бројните војни што беснеат овие години, со сета нивна нечовечка суровост, безброј мртви и неизмерно уништување, папата Фрањо континуирано го крева својот глас да бара мир, апелира до разумот и повикува на искрени преговори за изнаоѓање можни решенија“, потсети Ре во исклучително моќната проповед.
Кардиналот Ре го пофали папата Фрањо како спонтан папа со темперамент и директен манир. Франциск имал харизма на човек кој бил отворен и способен да слуша, а посебно внимание посветувал на луѓето на кои им е потребна и неуморно се залагал за нив. Тој беше папа кој живееше меѓу народот, народен папа.
Погребна поворка низ центарот на Рим
И на неговото последно патување низ центарот на Рим, тој не беше сам. Десетици илјади луѓе стоеја на патеката долга шест километри до базиликата Санта Марија Маџоре, каде што сакаше да биде погребан.
Белиот попамобил со едноставен дрвен ковчег не го помина најкраткиот пат од Ватикан до главната железничка станица Термини. Тој практично беше пренесен до неговото последно почивалиште во триумфална поворка низ големиот булевар Корсо Виторио Емануеле, минувајќи покрај симболите на градот, Римскиот форум и Колосеумот.
Многу луѓе чекаа пред базиликата Санта Марија Маџоре од рано изутрина, а на палатата спроти црквата беше развиен огромен транспарент: „Благодарам Франциск“.
Пристигнувајќи во базиликата, папата последен пат застана пред неговата омилена икона „Salus populi romani“, пред која често се молеше. Потоа бил погребан во тесен круг во нишата на таа црква, која е негова последна резиденција.
Конклава за избор на нов папа на почетокот на мај
Денот на погребот го означува почетокот на деветдневната официјална жалост, таканаречените Новендијали, при што секојдневно ќе се слави миса во базиликата Свети Петар за починатиот папа. Кога ќе поминат тие девет дена, односно по 4 мај, а најдоцна до 11 мај, ќе започне Конклавата, изборот на новиот папа.