Според наводите на изворот, Пакистан подготвил рамка за запирање на непријателствата и ја доставил до Иран и САД изминатата ноќ, предлагајќи двостепен пристап со моментален прекин на огнот, по што би следел сеопфатен договор.
„Сите елементи мора да бидат договорени денес“, изјавил изворот, додавајќи дека почетниот договор ќе биде структуриран како меморандум за разбирање, финализиран по електронски пат преку Пакистан, кој е единствениот комуникациски канал во преговорите.
Аксиос претходно, повикувајќи се на американски, израелски и регионални извори, објави дека САД, Иран и регионалните посредници разговараат за потенцијален 45-дневен прекин на огнот како дел од двофазен договор што би можел да доведе до трајно завршување на војната.
Изворот за Ројтерс изјавил дека началникот на пакистанската армија, фелдмаршалот Асим Мунир, бил во контакт „целата ноќ“ со потпретседателот на САД Џеј Ди Венс, специјалниот пратеник Стив Виткоф и иранскиот министер за надворешни работи Абас Аракчи.
Според предлогот, прекинот на огнот би стапил на сила веднаш, би се отворил повторно Ормускиот теснец, а би следеле 15 до 20 дена за финализирање на пошироко решение.
Договорот, неформално наречен „Исламабадски договор“, би вклучувал регионална рамка за теснецот, со завршни директни разговори во Исламабад.
Иранските власти претходно изјавија за Ројтерс дека Техеран бара траен прекин на огнот со гаранции дека повторно нема да биде нападнат од САД и Израел.
Се наведува дека Иран примил пораки од посредници, вклучувајќи ги Пакистан, Турција и Египет.
Се очекува конечниот договор да вклучува обврска од Техеран дека нема да се стреми кон нуклеарно оружје, во замена за ублажување на санкциите и ослободување на замрзнатите средства, изјавил изворот.
Два пакистански извори навеле дека Иран сè уште не се обврзал, и покрај засилените цивилни и воени активности.
„Иран сè уште нема одговорено“, рекол еден од изворите, додавајќи дека предлозите поддржани од Пакистан, Кина и САД за привремен прекин на огнот досега не довеле до прифаќање на обврски.