Иран погуби човек осуден за прободување на чувар и блокирање улица во Техеран, објави полуофицијалната новинска агенција Тасним, што е прва таква егзекуција за време на неодамнешните антивладини немири, објави Ројтерс.
Националните протести што избија по смртта на 22-годишниот ирански Курд Махса Амини на 16 септември претставуваат еден од најголемите предизвици за Исламската Република од нејзиното формирање во 1979 година.
Властите ги задушуваа протестите, а во понеделникот Револуционерната гарда го повика судството да донесе брзи и решителни казни против обвинетите за „злосторства против безбедноста на нацијата и исламот“.
Новинската агенција Тасним го именуваше погубениот Мохсен Шекари, но не даде дополнителни детали.
Амнести интернешенел соопшти дека иранските власти бараат смртна казна за најмалку 21 лице во, како што ги нарече, „лажни судења дизајнирани да ги заплашат оние кои се вклучени во народниот бунт што го потресе Иран“.
„Иранските власти треба веднаш да ги отповикаат сите смртни казни, да се воздржат од барање смртна казна и да ги отфрлат сите обвиненија против уапсените во врска со нивното мирно учество во протестите“, се вели во соопштението.
Западните влади, исто така, изразија тревога поради големиот број егзекуции во Иран.
Иран ги обвинува своите странски непријатели за немирите, вклучително и САД.
Во вторникот, портпаролот на судството, Масуд Сетајеши, објави дека пет лица обвинети за убиството на членот на милицијата Басиџ, Рухола Аџамијан, биле осудени на смрт, со казна што може да ја обжалат.
Во четвртокот, иранската полуофицијална новинска агенција ИСНА објави дека петмина осомничени членови на милитантната група Исламска држава биле обвинети за „војна против Бог“ за нивната улога во масакрот на шиитските аџии во октомври, кривично дело казниво со смрт.
Дури и пред неодамнешните немири, Иран забележа зголемен број на егзекуции. Високиот комесар на ОН за човекови права, Волкер Тирк, рече дека бројката оваа година надмина 400 во септември за прв пат во пет години.