Иран го извести Советот за безбедност на Обединетите нации и Меѓународната поморска организација дека „ненепријателските пловни објекти“ можат да поминуваат низ Ормутскиот теснец доколку претходно се усогласат со иранските власти. Оваа порака доаѓа во момент кога американско-израелската војна против Иран речиси го запре протокот на околу една петтина од светската нафта и течниот природен гас низ теснецот, што предизвика значителни нарушувања во глобалното снабдување, пишува Ројтерс.
Дописот од иранското Министерство за надворешни работи е испратен во неделата до Советот за безбедност, кој брои 15 членки, како и до генералниот секретар на ОН, Антонио Гутереш. Во вторникот документот бил проследен и до 176-те земји членки на Меѓународната поморска организација (ИМО), агенција на ОН со седиште во Лондон, задолжена за безбедноста на меѓународната пловидба и спречување на загадување на морињата.
Правила за безбеден премин
„Непријателските пловни објекти, вклучително и оние што припаѓаат на други држави или се поврзани со нив, можат да го остварат правото на безбеден премин низ Ормутскиот теснец во координација со надлежните ирански власти. Услов е да не учествуваат во агресија против Иран, ниту да ја поддржуваат, и целосно да ги почитуваат објавените безбедносни прописи“, се наведува во дописот.
Во документот се нагласува дека Иран „презел неопходни и пропорционални мерки за да ги спречи агресорите и нивните поддржувачи да го користат Ормутскиот теснец за спроведување непријателски операции против Иран“.
Се додава дека пловните објекти, опремата и целиот имот што им припаѓа на Соединетите Американски Држави или Израел, „како и на другите учесници во агресијата, не ги исполнуваат условите за безопасен или непријателски премин“. „Фајненшл тајмс“ прв објави дека дописот во вторникот бил проследен до земјите членки на ИМО.
