Киев и Москва повторно ја разменија вината за нападот на нуклеарната централа Запорожје, окупирана од Русија, најголемата во Европа, која беше нападната неколку пати во текот на една недела.
„Ограничете го вашето присуство на улиците на Енергодар! Добивме информации за нови провокации на руските окупатори“, објави украинската нуклеарна агенција Енергоатом на Telegram. „Според локалните жители од Енергодар, фабриката е повторно гранатирана“.
Москва, која ја контролира фабриката и околните области, ги обвини украинските сили дека стојат зад нападот.
„Енергодар и нуклеарната централа Запорожје повторно се под оган од борците на (украинскиот претседател Володимир) Зеленски“, изјави на Телеграм Владимир Рогов, член на проруската воена и цивилна администрација.
Проектилите паднале „во областите лоцирани на бреговите на Днепар и во електраната“, објави Рогов, без да открие податоци за жртви или штети.
Реката Днепар ги дели областите контролирани од Русија од оние во украински раце.
Москва и Киев меѓусебно се обвинуваат за неколку ракетни напади насочени кон електраната. Тие ги зголемија стравувањата од нуклеарна катастрофа и испровоцираа состанок на Советот за безбедност на ОН во четвртокот.
Првите удари, на 5 август, погодија трансформатор на високонапонска далновод, предизвикувајќи реакторот бр. 3 на најголемата европска нуклеарна централа автоматски да се исклучи и да ги стартува своите генератори за итни случаи.
Последните напади во четвртокот оштетија пумпна станица и сензори за мерење на радиоактивноста.
Украинските власти повикаа на демилитаризација на областа и повлекување на руските војници кои ја окупираа областа од март. Претседателот на Украина Володимир Зеленски ја опиша конфронтацијата околу централата како „руска нуклеарна уцена“.