Севернокорејскиот лидер Ким Џонг Ун ја посети фабриката за муниција, каде што тестираше пиштоли и го надгледуваше производството на огнено оружје, јави државната агенција KCNA.
Фотографиите што ги објави KCNA го прикажуваат Ким како го обиколува погонот заедно со својата ќерка Џу Ае, која учествувала и во вежба за гаѓање со воени претставници.
За време на посетата, Ким повикал на модернизација на производните процеси и проширување на капацитетите на фабриката „на далекувиден начин“, нагласувајќи дека тоа ќе помогне во зголемување на борбената ефикасност на армијата, пренесе Ројтерс.
KCNA потсети дека Ким неодамна го надгледувал и пробното лансирање на стратешка крстосувачка ракета од новоизграден разурнувач.
Јужнокорејската Национална разузнавачка служба (NIS) наведе дека постојат знаци оти Џу Ае веќе учествува во политички прашања, а се шпекулира дека се подготвува за можно идно именување како наследник на чело на државата.