Косовската полиција соопшти дека граничниот премин Мердаре е отворен и сообраќајот е нормализиран на таа релација.
Преминот Мердара беше затворен поради барикадите што ги поставија Србите во знак на протест против апсењето на поранешниот полицаец Дејан Пантиќ на Косово. Отстранувањето на барикадите започна откако Пантиќ беше пуштен во домашен притвор, додава агенцијата.
Српскиот претседател Александар Вучиќ во средата доцна навечер најави дека Србите, кои во изминатите 19 дена ги блокираа патиштата во северно Косово во знак на протест против апсењето на поранешен полицаец, ќе почнат со отстранување на барикадите во четврток наутро. „Тоа е долг процес. Ќе потрае некое време“, рече Вучиќ по состанокот на Србите од северно Косово во српскиот град Рашки.
Шефот на кабинетот на српската влада за Косово, Петар Петковиќ, изјави дека „никогаш не добиле посилни гаранции“ од Соединетите Американски Држави и од Европската Унија дека никој од Србите кои протестираа на Косово и подигнаа барикади нема да бидат кривично гонети или уапсени. Петковиќ рече дека се добиени и гаранции дека косовските безбедносни сили не смеат во северно Косово без претходна согласност на командантот на КФОР и претставници на локалното население.
Недели на напнатост
Билатералните тензии меѓу Белград и Приштина се зголемуваат од минатиот месец, кога етничките Срби во северно Косово ги напуштија државните институции, вклучително и полицијата и судството, поради одлуката на косовската влада да ги замени табличките на автомобилите издадени од Србија.
Србите во северно Косово подигнаа барикади и блокираа патишта три недели откако косовската полиција го уапси поранешниот полицаец Дејан Пантиќ, обвинет за тероризам и „напаѓање на уставниот поредок“ за наводен напад во просториите на Централната изборна комисија на Косово.
Неговото ослободување беше едно од главните барања на демонстрантите, а во средата беше донесена одлука да биде пуштен во домашен притвор.