Дали ви наплатиле за ЕХО или ПАП-тест кај матичен гинеколог? Ако одговорот е да – сте биле измамени. Ова го потврдија резултатите од големата заедничка акција на ФЗО и УЈП, која откри масовни злоупотреби во приватните гинеколошки ординации.
По долгогодишна пауза (прва ваква контрола од 2012 година), институциите влегоа во 49 ординации низ државата. Билансот е поразителен: речиси 50% од нив (23 ординации) работат надвор од законот, на штета на џебот на пациентките и на државниот буџет.
Што е бесплатно, а се наплаќало?
Директорот на ФЗО, Сашо Клековски, беше дециден – матичните гинеколози добиваат пари од Фондот (капитација) и не смеат да наплаќаат за основните услуги. Контролите откриле дека осум ординации незаконски земале пари од пациентките за:
- ЕХО прегледи;
- Колпоскопија;
- Земање брис за микробиолошко испитување;
- ПАП-тестови.
Овие услуги, согласно медицината заснована на докази, кај избраниот лекар се бесплатни.
Географија на измамата: Струмица најнеуредна, Битола за пример
Контролата ги опфати Скопје, Битола, Прилеп, Тетово, Штип и Струмица, а резултатите покажаа драстични разлики по градови:
- Струмица (Најлош резултат): Од 5 контролирани ординации, дури 4 биле неуредни.
- Скопје: Висок степен на прекршоци – од 16 ординации, 9 биле „фатени“ во неправилности.
- Битола и Прилеп: Најдисциплинирани – 70% од ординациите работеле без грешка.
УЈП: Се крие промет за да се купува имот и луксуз
Директорката на УЈП, Елена Петрова, откри дека даночниот морал е на ниско ниво. Иако здравствените услуги се ослободени од ДДВ и плаќаат симболичен данок на добивка (1%), многу лекари не издавале фискални сметки.
„Кај 35% од ординациите (16 установи) фативме неправилности во евидентирањето на кешот. Неевидентирањето на приходите остава простор за нивно користење како неоданочени лични примања и стекнување личен имот, што директно ја храни сивата економија“, предупреди Петрова.
Казни и закана со клуч на врата
Сите 23 ординации заработија парични казни. Но, УЈП испрати и сериозно предупредување: „Глобата е за прва грешка. При втора неправилност во рок од две години, следува запечатување на ординацијата од 15 до 30 дена“.