Македонскиот пасош овозможува безвизно патување до десетици дестинации во светот, а според рангирањето на „Паспорт репортс“ (Passport Reports), земјата се наоѓа на 59. место на листата за сила на пасошите. Индексот го оценува пристапот што го имаат граѓаните до странски дестинации, вклучувајќи ги земјите во кои може да се патува без виза или со поедноставени процедури за влез.
На европската листа, македонскиот пасош е рангиран на 39. место меѓу 47 земји. Во регионот, Србија се наоѓа на 59. место, Црна Гора на 65., Албанија на 79., а Косово на 93. место.
Покрај пристапот на македонските државјани до други земји, индексот ја оценува и отвореноста на Македонија за странски посетители. На одделната листа за гостопримливост, земјата е на 89. место меѓу 199 држави. Оваа категорија ја мери леснотијата со која странските државјани можат да влезат во Македонија.
Според податоците на „Паспорт репортс“, македонските државјани можат без виза да патуваат во Албанија и Србија, како и во сите 29 земји од Шенген-зоната.
Сепак, безвизното патување не значи дека за сите дестинации нема дополнителни формалности. За Малезија, на пример, е наведена обврска за пополнување картичка за пристигнување, со можност за престој до 30 дена, додека за Суринам е потребна туристичка картичка, а дозволениот престој е до 90 дена.
За одредени земји постојат и други начини за добивање дозвола за влез. Египет е наведен како дестинација во која може да се добие виза по пристигнувањето, со можност и за електронска виза. Сејшелите, пак, бараат електронско одобрение за патување и туристичка регистрација.
Македонија не е членка на Шенген-зоната, но македонските граѓани имаат право на безвизно патување во нејзините 29 земји, согласно важечките правила за краткорочен престој.