Министерството за култура и туризам со длабока тага ја прими веста за смртта на истакнатиот македонски театарски режисер, драматург и културен деец Сашо Миленковски, оценувајќи дека со неговото заминување македонската култура загуби еден од своите најзначајни и најавтентични театарски творци.
Во соопштението се наведува дека Миленковски зад себе остави богат уметнички опус и неизбришлива трага во современиот македонски театар. Во текот на својата повеќедецениска кариера реализирал повеќе од педесет театарски претстави, афирмирајќи ја македонската драмска литература и создавајќи сценски дела што ќе останат трајна вредност во националното културно наследство.
Од Министерството потсетуваат дека Миленковски бил режисер, драматург и директор на Македонскиот народен театар, а подоцна и драматург во Драмскиот театар – Скопје. Според нив, неговата посветеност, визија и препознатлив авторски ракопис дале исклучителен придонес во развојот на македонската театарска уметност и во промоцијата на домашното творештво во земјата и во странство.
„Неговата посветеност, визија и препознатлив авторски ракопис инспирираа генерации театарски уметници и оставија длабок белег во културниот живот на Македонија“, се наведува во соопштението.
Министерството за култура и туризам изрази искрено сочувство до семејството на Сашо Миленковски, неговите колеги, пријатели и до целокупната македонска културна јавност, истакнувајќи дека споменот на неговото значајно творештво ќе остане трајно вграден во историјата на македонската култура.