Во следниот период се очекуваат промени во здравствениот систем, при што позитивната листа на лекови ќе биде дополнително проширена, најави премиерот Христијан Мицкоски.
Тој посочи дека мерката треба да овозможи поголема достапност на терапија за пациентите и подобрување на квалитетот на здравствените услуги, но нагласи дека системот мора да биде стабилен и отпорен на злоупотреби за да функционира ефикасно.
Во својата изјава, премиерот укажа дека квалитетни здравствени услуги не можат да се обезбедат доколку системот се оптоварува со неправилности и злоупотреби. Како пример, тој наведе случаи во кои, според неговите тврдења, биле евидентирани дежурства и прекувремени часови кои не соодветствуваат со реалните работни услови, вклучително и ситуации со 24-часовно работење во тек на еден ден.
Мицкоски додаде дека Владата работи на пошироки промени во здравствениот сектор, со цел унапредување на организацијата и зголемување на контролата, нагласувајќи дека ваков тип на реформи не биле спроведени подолг период.
