Уапсени се директорот на тематскиот парк на руската армија „Патриотски парк“ во градот Кубинка кај Москва, каде што се изложени воени експонати, Вјачеслав Ахмедов и генералот Владимир Шестеров, заменик-шефот на Одделот за иновации на Министерството за одбрана.
Тие беа обвинети за измама како дел од широката истрага за злоупотреба на службената положба во највисоките ешалони на военото раководство, соопшти Истражниот комитет, највисоката државна агенција за криминални истраги на Русија.
Комитетот соопшти дека двајцата функционери се осомничени за проневера на државни пари наменети за „Паркот Патриотски“, џиновска воена изложба и конгресен центар западно од Москва.
На површина од повеќе од 5.400 хектари, од неговото отворање во 2015 година, паркот е домаќин на годишни воени форуми, меѓународни состаноци и постојани изложби на руско оружје. Покрај конференциските сали и пространите изложбени простори, вклучува воздухопловна база, големо стрелиште и црква.
Претходно беа уапсени голем број високи воени функционери кои беа дел од потесниот круг на Сергеј Шојгу, кој оваа пролет беше разрешен од функцијата министер за одбрана од рускиот претседател Владимир Путин.
Шојгу ја доби функцијата секретар на Советот за безбедност на Русија, но неколку негови блиски соработници останаа без работа, а некои беа уапсени, меѓу кои и неговиот заменик Тимур Иванов, за примање мито.
Поранешниот министер за одбрана беше критикуван за неуспехот на Русија на бојното поле во Украина, а беше обвинет за неспособност и корупција од водачот на платеничката армија Вагнер Евгениј Пригожин, кој започна краток бунт во јуни 2023 година барајќи, меѓу другото, отстранување на Шојгу.