Утрово во земјава се измерени ниски температури, при што најстудено било на Попова Шапка со -7 степени Целзиусови. Под нулата се и Берово и Крушево со -3, како и Маврови Анови со -2 степени.
Температура од 1 степен е измерена во Охрид, Крива Паланка, Претор и Битола, додека 2 степени се регистрирани во Тетово, Прилеп, Струмица и Штип. Во Скопје, на мерните места Зајчев Рид и Петровец, како и во Куманово и Виница, утринската температура изнесувала 3 степени. Малку потопло било во Кавадарци и Демир Капија со 4 степени, во Велес со 5, а најтопло утрово било во Гевгелија со 7 степени.
На Попова Шапка е измерена и најголема висина на снежна покривка, која достигнува 58 сантиметри.
Според најавите, времето денес ќе биде променливо облачно со сончеви периоди. Ќе дува слаб до умерен ветер од северен правец, а максималната дневна температура ќе се движи во интервал од 9 до 16 степени.
Во Скопје се очекува слично време – променливо облачно со сончеви периоди и слаб до умерен северен ветер. Максималната температура во главниот град ќе достигне до 15 степени.
