Во ноќта меѓу сабота, 24 октомври, и недела, 25 октомври, започнува зимското сметање на времето. Во 3 часот наутро стрелките на часовникот ќе се поместат еден час наназад, односно времето ќе се врати на 2 часот. Тоа значи дека граѓаните ќе имаат еден час повеќе за спиење.
Македонија, како и останатите земји од регионот и членките на Европската Унија, и оваа година го следи воспоставениот распоред за сезонско менување на времето.
Со преминувањето на зимското сметање на времето, утрата ќе бидат посветли, но затоа ќе се стемнува еден час порано. Најголемиот дел од современите електронски уреди, вклучувајќи ги мобилните телефони и компјутерите, автоматски ќе го прилагодат времето.
Освен земјите од Европската Унија, часовниците викендов ќе ги поместат и Норвешка, Швајцарија, Молдавија и Украина, со одредени исклучоци на територии кои не се под контрола на украинските власти.
Кои земји не го менуваат времето?
Иако сезонското менување на времето е широко распространето во Европа, неколку држави одамна се откажале од оваа практика.
Исланд во текот на целата година го задржува истото време, додека Белорусија во 2011 година одлучи трајно да остане на временската зона UTC+3.
Русија во 2014 година го укина сезонското поместување на часовниците, а Турција во 2016 година одлучи трајно да го задржи летното сметање на времето.
Часовниците не се поместуваат ниту во Ерменија, Грузија и Азербејџан.
Надвор од Европа, сезонското менување на времето во изминатите години го укинаа и Бразил, Иран, Јордан, Намибија, Самоа, Сирија и Уругвај.
Канадската провинција Британска Колумбија во март 2026 година одлучи трајно да го задржи летното сметање на времето.
Европската Унија сè уште нема одлука за укинување на поместувањето
Прашањето за укинување на сезонското менување на времето со години е предмет на дискусија во Европската Унија.
Европската комисија уште во 2018 година предложи да се стави крај на поместувањето на часовниците двапати годишно, а Европскиот парламент го поддржа предлогот.
Сепак, земјите членки сè уште немаат постигнато конечен договор, поради што продолжува примената на постојниот систем.
Според европските правила, летното сметање на времето започнува последната недела во март, додека зимското започнува последната недела во октомври.
Во САД часовниците ќе се поместат на 1 ноември
За разлика од Европа, Соединетите Американски Држави годинава ќе преминат на зимско сметање на времето на 1 ноември.
Во американскиот Конгрес истовремено се разгледува можноста за трајно воведување на летното сметање на времето.
Претставничкиот дом на 14 јули 2026 година го усвои законскиот предлог познат како „Sunshine Protection Act“, со кој се предвидува укинување на сезонското поместување на часовниците.
За предлогот да стане закон, потребно е да биде усвоен и во Сенатот, а потоа да биде потпишан од американскиот претседател.
Зошто воопшто се поместуваат часовниците?
Практиката на сезонско менување на времето за првпат била воведена на 30 април 1916 година во Германското Царство и Австро-Унгарија, за време на Првата светска војна.
Главната цел била заштеда на енергија, односно намалување на потрошувачката на јаглен.
Подоцна практиката се проширила и во други земји, особено по нафтената криза во 1973 година, кога прашањето за енергетската ефикасност добило поголемо значење.
Од 1996 година земјите членки на Европската Унија ги поместуваат часовниците во исти денови.
Сепак, современите истражувања ја доведуваат во прашање вистинската енергетска корист од ваквата практика. Според германската Федерална агенција за животна средина, потенцијалните заштеди на електрична енергија во голема мера се поништуваат поради зголемената потрошувачка за греење во постудените утрински часови.
Зимското сметање на времето во Македонија ќе трае до последната недела во март 2027 година, кога часовниците повторно ќе се поместат еден час нанапред.