Три патнички возила беа зафатени во пожар што избувна синоќа по полноќ на булеварот „Видое Смилевски Бато“ во населбата Аеродром.
Според информациите од МВР, огнената стихија започнала во 00:13 часот во возило „сеат леон“, сопственост на 48-годишниот С.Д. од Скопје. Огнот брзо се проширил, оштетувајќи уште две соседни паркирани возила: „хјундаи“, сопственост на 74-годишен скопјанец и „опел мерива“, сопственост на лице од Долно Лисиче.
Екипа на Бригадата за противпожарна заштита Скопје веднаш интервенирала и го локализирала пожарот, спречувајќи уште поголема штета на околните автомобили.
„Повредени лица нема, а полициски екипи веќе извршија увид на местото на настанот за да се утврдат причините за пожарот“, велат од МВР.
Материјалната штета е видлива, а истрагата треба да покаже дали станува збор за неисправна инсталација на првото возило или пожарот бил подметнат.