Од денеска (недела, 14 декември) стапува на сила новиот возен ред на „Македонски железници“ (МЖ), кој ќе важи до 12 декември следната година. Иако формално се предвидени десет пара патнички возови, реалната слика на македонските пруги е значително поразлична поради инфраструктурни зафати и долгогодишни укинувања.
Според официјалниот план, патниците би требало да имаат на располагање:
- Три пара возови од Скопје за Битола;
- Три пара возови за Велес;
- Два пара за Куманово;
- Два пара за Гевгелија.
Сепак, во пракса, од овие десет планирани линии, моментално сообраќаат само седум.
Реконструкцијата на „Скопје-Зелениково“ укина три линии до јуни
Разликата меѓу „хартијата“ и теренот се должи на реконструкцијата на пругата на делницата Скопје – Зелениково. Поради градежните работи, во временскиот интервал од 07:30 до 16:30 часот (вкупно 9 часа), целосно е прекинат и патничкиот и товарниот железнички сообраќај.
Ова резултираше со времени рестрикции кои започнаа уште од четвртокот (11 декември) и ќе траат сè до 10 јуни следната година. Во овој период нема да сообраќаат:
- Два локални воза на релација Скопје – Велес;
- Еден воз за Битола.
Кичево, Кочани и светот остануваат отсечени
Новиот возен ред не носи добри вести ниту за жителите на западниот и источниот дел од земјата. Линиите од Скопје кон Кичево и Кочани остануваат укинати, статус кој го имаат уште од мај 2021 година.
Исто така, Македонија останува железнички изолирана од соседите – нема меѓународни возови кон Грција, Србија и Косово. Во однос на самите термини на поаѓање за активните линии, речиси и да нема промени споредено со досегашниот распоред.
„Шпанецот“ стана атракција за Дедо Мраз
Во морето од технички проблеми, МЖ се пофали со еден репариран воз. Станува збор за т.н. „Шпанец“ – моторна гарнитура набавена далечната 1973 година.
Сепак, наместо за редовен превоз, оваа гарнитура деновиве се користи за комерцијални цели – служи како локација за престој на Дедо Мраз и детски претстави со наплата на билети. Според неофицијални информации, планот е по завршувањето на реконструкцијата на пругата, овој „ветеран“ да сообраќа како градски воз на релација Скопје – Зелениково.
