Шпанскиот премиер Педро Санчез денеска најави измени на законот со кој се регулира работата на разузнавачките служби, кои првенствено имаат за цел „јакнење на судската контрола“ врз нив. Ова се случи по бучниот шпионски скандал што ја потресе земјата, пренесе АФП.
„Се работи за зајакнување на гаранциите за таква контрола, но и за обезбедување максимално почитување на личните и политичките права на (соодветните) лица“, рече левичарскиот премиер пред парламентот.
Санчез, исто така, рече дека наскоро ќе биде донесен нов закон за „класифицирани информации“. Сегашното законодавство во оваа област датира од 1968 година, времето на диктатурата на Франко. „Време е прописите да се прилагодат на демократските, уставни принципи“, рече тој.
Минатиот месец избувна скандал што доведе до губење на Пас Естебан, шеф на Националниот разузнавачки центар на Шпанија. Ова дојде по откритијата дека телефоните на каталонските сепаратисти биле прислушувани од тајните служби преку израелската шпионска програма Пегазус. Сепаратистите потоа се заканија дека ќе ја прекинат парламентарната поддршка за малцинската влада на Санчез, ризикувајќи го неговиот пад пред да му заврши мандатот на крајот на 2023 година.
Случајот доби друга димензија кога владата откри дека самиот Санчез и неговата министерка за одбрана, Маргарита Роблес, исто така биле шпионирани со истиот софтвер – овој пат како дел од „надворешен напад“ чиј сторител се уште не е познат.
Реформите објавени денеска „ќе ги расветлат процедурите за да се избегнат нови безбедносни нарушувања во иднина“, увери шпанскиот премиер.
