Во рамки на посетата на хрватскиот премиер Андреј Пленковиќ во Македонија, претседателот на Стопанска комора на Северна Македонија, Бранко Азески, им врачи признанија на Пленковиќ и на македонскиот премиер Христијан Мицкоски за нивниот придонес во регионалната бизнис интеграција и економска соработка.
Наградите беа доделени во рамки на заедничка средба меѓу бизнис-заедниците од Македонија и Хрватска, при што Азески истакна дека признанијата претставуваат благодарност за континуираната поддршка што двајцата премиери ја даваат за продлабочување на економските односи, зголемување на трговската размена и отворање нови можности за компаниите од регионот.
Според Комората, Пленковиќ како лидер на земја-членка на Европската Унија активно придонесува за европската интеграција на земјите од Западен Балкан, вклучително и Македонија, преку пренесување искуства, стандарди и добри практики. Како значаен чекор беше посочена и одлуката на Хрватска за овозможување долгорочни визи за професионалните возачи, со што се олеснува нивниот престој во шенген-зоната.
За Мицкоски, Азески оцени дека преку економските реформи, поддршката на приватниот сектор и подобрувањето на инвестициската клима, активно работи на позиционирање на Македонија како сигурен економски партнер и атрактивна дестинација за инвестиции.
Во своето обраќање, Азески нагласи дека признанијата се доделуваат како потврда за долгогодишната посветеност на двајцата политички лидери кон развојот на економската и регионалната соработка.