Поплавите и поројните дождови , кои зафатија голем број области на Филипините на Божиќ, ги однесоа животите на 15 лица , објави филипинската канцеларија за управување со катастрофи, цитирана од ДПА.
„Повеќето од смртните случаи се давеници , кои се резултат на поплавите“, рече Диего Маријано, претставник на службата.
Осум од смртните случаи биле пријавени во јужните провинции Мисамис Ориентал, Мисамис Оксидентал и Замбоанга дел Сур. Пет лица загинаа во источните провинции Камаринс Сур, Катандуанес и Северен Самар.
Двајца рибари се удавија откако нивниот чамец се преврте на Божиќ во близина на брегот на провинцијата Јужен Лејте, соопшти крајбрежната стража.
Повеќе од 166.000 луѓе во десетина филипински провинции беа погодени од поројните дождови и поплави, а 45.337 од нив беа принудени да ги напуштат своите домови и да се засолнат во центрите за евакуација.