Во пресрет на една година од трагичниот пожар во клубот „Пулс“ во Кочани, во кој животот го загубија 63 лица, а повеќе од 200 беа повредени, Министерството за здравство работи на решение со кое повредените би биле ослободени од плаќање партиципација за здравствените услуги.
Министерот за здравство Азир Алиу информираше дека е формирана работна група која разгледува можности како ова прашање да се реши преку некоја од постојните програми, со цел пациентите и нивните семејства да не мора дополнително да плаќаат за лекување.
„Дефинитивно работиме на креирање програма. Партиципацијата е законска обврска и институциите мора да наплатуваат за секој пациент, но разговараме со работната група да најдеме начин тоа да се вклучи во некоја од постојните програми. Тоа е едно од ветувањата – лично мое и на Владата – за да се реши овој проблем. Таа партиципација, колку и да е мала, треба да се отстрани за граѓаните кои имаат потреба од третман да не плаќаат“, изјави Алиу при денешната посета на болницата во Кочани.
Посетата беше поврзана и со почетокот на активности за уредување на дворот на кочанската болница. Во рамки на акцијата се расчистуваат делови од болничкиот круг каде со години се трупале отпад и вегетација.
Директорката на болницата Катерина Паниќ–Мирчовска и градоначалникот на Кочани Владко Грозданов најавија дека со уредувањето ќе се обезбедат повеќе паркинг места и полесен пристап за возилата на Итната медицинска помош, пациентите и вработените.
Според најавите од општината, предвидено е и демонтирање на модуларната болница, со што ќе се ослободи дополнителен простор во кругот на здравствената установа.
