На покана на министерката за одбрана Славјанка Петровска, претседателот на Собранието, Талат Џафери, заменик претседателот на Собранието, Горан Мисовски и членови на собраниската Комисија за одбрана и безбедност денеска во штипската касарна “Јане Сандански” можеа да проследат показна вежба чиј составен дел беа и новите, најмодерни лесни оклопни возила на Армијата на Република Северна Македонија, JLTV Oshkosh.
Вежбата „Употреба на JLTV возилата при изведување на борбени операции со воздушна поддршка“ ја изведоа припадниците на вториот баталјон од 1. пешадиска бригада на Армијата, единица која пред пет месеци успешно го помина НАТО оценувањето.
По вежбата од страна на припадниците на армиската НАТО единица присутните беа запознаени и со тактичко техничките карактеристики на возилата и нивната намена, а беше презентиран и дел од нивната лична опрема и вооружување.
Првите 6 нови лесни оклопни транспортери од американско производство пристигнаа во јули годинава и со нив значително е подобрена борбената готовност на Армијата. Се очекува во следниот период да биде испорачана нова пратка од 27 возила од овој тип.