Шпанската полиција разби секта на Канарските Острови која искористувала ранливи лица, наплаќајќи им огромни суми за бизарни ритуали кои вклучувале жртвување животни и конзумација на опојни дроги. Уапсени се пет лица, а водачот на култот заврши во притвор откако беше откриено дека на дел од поранешните следбеници им била потребна психијатриска помош, пишува „Евроњуз“.
Полицијата во вторникот извести дека четири лица се уапсени на Тенерифе, а едно во Лас Палмас де Гран Канарија. Тие се товарат за низа кривични дела, вклучувајќи злосторничко здружување, злоупотреба на животни, измама, нанесување повреди, дела против јавното здравје и фалсификување документи.
Според наводите од истрагата, водачите на групата целеле кон лековерни и ранливи поединци, со кои манипулирале преку всадување страв, вклучувајќи и наводни духовни закани. Членовите плаќале високи износи за ритуали кои им ветувале лична корист, духовна заштита или дури и излекување од болести.
За време на церемониите, учесниците морале да жртвуваат домашни животни и да конзумираат супстанции опасни по здравјето. Полицијата наведе дека станува збор за растението татула (bunica), „поперс“, кокаин и други халуциногени дроги, нагласувајќи дека нивната употреба претставувала сериозен ризик за сите вклучени.
Психолошката контрола која ја спроведувал водачот на култот била толку силна што на неколку поранешни следбеници по напуштањето на групата им било потребно психијатриско лекување, стои во полициското соопштение. Осомничените се изведени пред судија, кој на водачот на групата му одреди истражен затвор, додека останатите се пуштени со мерки на претпазливост.
Иако „сантерија“ – афро-карипска религија која ги спојува верувањата на западноафриканскиот народ Јоруба со елементи на римокатолицизмот – е легитимна духовна практика со милиони следбеници, властите истакнуваат дека оваа група делувала исклучиво како криминална организација.
Исконските духовни уверувања ги користеле само како параван за стекнување финансиска корист. Шпанската национална полиција на крајот предупреди на опасноста која ја претставуваат ваквите организации, кои се кријат зад духовноста за да вршат кривични дела и илегално да се богатат.