Четири лица починаа во Шпанија, две во Франција и две во Италија, бидејќи силниот топлотен бран продолжува да парализира голем дел од Европа. Рекорден број предупредувања се издадени, избувнаа шумски пожари, а реактор во швајцарска нуклеарна централа е принуден да се затвори, објавува Ројтерс.
Во Шпанија, властите потврдија дека две лица загинале во пожар во Каталонија, додека уште два смртни случаи поврзани со топлината се регистрирани во регионите Екстремадура и Кордоба. Францускиот министер за енергетика објави уште два смртни случаи поврзани со топлината и дури 300 лица се хоспитализирани.
Италија издаде црвени предупредувања за 18 градови во понеделник, додека во Германија температурите достигнаа 40°C, најжешкиот ден во годината. Во Сардинија, двајца мажи над 60 години починаа од топлотен удар на плажа, објави ANSA.
Метео Франс соопшти дека црвените предупредувања се уште се на сила за неколку области во централна Франција. Ранливите групи се изложени на најголем ризик, а француската министерка за здравство, Катрин Вотрин, рече дека претпазливоста мора да остане висока.
„Ќе ги видиме последиците во наредните денови, особено за најранливите. Особено мислам на постарите лица“, рече таа.
Турција, која претходно оваа недела се бореше со пожари на неколку локации и мораше привремено да евакуира околу 50.000 луѓе, изјави дека пожарите сега се во голема мера под контрола.
Пожар во Каталонија зафати неколку фарми и се прошири на површина од околу 40 километри пред да биде ставен под контрола.
Во Франција избувна дебата за климатизацијата.
Лидерката на француската крајна десница, Марин Ле Пен, го искористи топлотниот бран за да води кампања за претседателските избори во 2027 година, најавувајќи голем национален план за климатизација. „Климатизацијата спасува животи“, рече Ле Пен. Таа додаде дека проблемот е што јавните служби во Франција честопати не можат да функционираат правилно поради недостаток на климатизација, за разлика од другите европски земји.
Нејзиниот сојузник Ерик Чиоти неодамна предложи закон со кој се бара задолжително климатизирање на клучните јавни простори. Сепак, владата го критикуваше предлогот, нарекувајќи го неодговорен и несоодветен за справување со климатската криза. „Климатизацијата не може да се инсталира насекаде бидејќи го загрева воздухот уште повеќе и не е долгорочно решение“, рече министерката за животна средина Ањес Пание-Рунашер.
Лидерката на зелените, Марин Тонделиер, го осуди пристапот на крајната десница како „купување клима уреди“ и рече дека фокусот треба да биде на проширување на зелените површини и подобра изолација на зградите.
Италија, Франција и Германија предупредија на можноста за силни бури поради силното затоплување во нестабилна атмосфера. Во понеделник вечерта, бурите предизвикаа лизгање на земјиштето во француските Алпи што ги прекинаа железничките услуги меѓу Париз и Милано.
Швајцарската енергетска компанија Axpo затвори еден реактор во својата нуклеарна централа Безнау во вторник поради високите температури на реката, додека производството во друг реактор беше преполовено. Водата во електраните се користи за ладење, а ограничувањата би можеле да траат додека температурите продолжуваат да растат.
„Алијанц Рисрч“ во извештај наведува дека екстремната топлина би можела да го забави економскиот раст во Европа за половина процентен поен во 2025 година. Предупредува дека еден ден со температури над 32°C би можел да има финансиски импакт споредлив со половина ден штрајкови.
Научниците велат дека топлотните бранови оваа година пристигнале порано од вообичаеното, при што температурите се зголемиле до 10°C во некои региони. Затоплувањето на морињата помогнало во создавањето на термална купола што ги заробила топлите воздушни маси над поголемиот дел од континентот.
Научната заедница вели дека емисиите на стакленички гасови од фосилните горива се главната причина за климатските промени, а уништувањето на шумите и индустриското производство исто така придонесуваат. Минатата година беше најжешката досега.
„Екстремната топлина ја тестира нашата отпорност и го става во опасност здравјето и животите на милиони луѓе“, рече Ингер Андерсен, извршен директор на Програмата на Обединетите нации за животна средина.
„Во новата климатска реалност, повеќе не можеме да бидеме изненадени од рекордни температури секоја година.“
Предупредувањето на „Алијанц Рисрч“ дека топлината ќе предизвика пад на економската активност веќе почнува да се материјализира. Британскиот синџир пекари „Грегс“ во среда предупреди дека профитот оваа година може да биде помал од минатогодишниот, бидејќи високите температури ги одвраќаат луѓето од јадење надвор.
Во Германија, луѓето се собраа во базените и езерата за да се разладат, а многу училишта беа затворени. Пожарникарите се бореа со неколку шумски пожари во сојузните покраини Бранденбург и Саксонија.
Горниот кат на Ајфеловата кула во Париз беше затворен за посетители во вторник, а во Брисел, познатиот Атомиум – метална структура во облик на атом – беше затворен порано во среда, трето такво затворање оваа недела. Шпанија го имаше најтоплиот јуни досега, додека Франција го забележа најтоплиот јуни од 2003 година.