Министерот за дигитална трансформација, Стефан Андоновски, учествуваше на министерски состанок меѓу Европската комисија и министрите од Западен Балкан, посветен на иницијативата „Roam Like at Home“ („Роаминг како дома“). На видеоконференцијата се разгледаа клучните елементи на преговарачката рамка, следните чекори и подготвеноста на земјите од регионот за пристапување кон режим што овозможува користење мобилни услуги во Европската унија под услови како дома.
„Роаминг како дома не е само техничко усогласување на регулативата, туку конкретна и многу видлива придобивка за граѓаните, бизнисите, студентите и туристите. Нашата цел е да ја доближиме Македонија до дигиталниот единствен пазар на ЕУ, да ги намалиме бариерите и придобивките од европската интеграција да се почувствуваат практично и директно“, истакна министерот
- Пониски трошоци за повици, пораки и мобилен интернет при патувања во ЕУ.
- Подобра поврзаност и полесна комуникација за граѓаните и компаниите.
- Олеснето патување и интензивирана економска размена.
Иницијативата е чекор кон интеграција во дигиталниот единствен пазар на ЕУ и кон материјализирање на опипливи придобивки од европската интеграција.
Досега преземени чекори
- Во август 2025: подготвен сеопфатен Акционен план со јасни чекори, институционални одговорности и временска рамка за усогласување со европското acquis во роаминг и електронски комуникации.
- Спроведени четири детални анализи од работната група.
- Подготвен законодавен пакет: нацрт-закон за изменување на Законот за електронски комуникации и пет подзаконски акти (два правилници и три одлуки).
- Вклучување на телекомуникациските оператори и темелна обработка на доставените коментари.
- По јавната консултација, Владата го утврди текстот и кон крајот на февруари го достави до службите на Европската комисија за мислење.
- Формирана посебна преговарачка работна група за институционален континуитет и координација.
Следни чекори
- Очекување на потврда од Европската комисија за нивото на усогласеност на предложената правна рамка.
- Интензивирање на преговорите веднаш по добивањето на мислењето.
- Продолжување на транспарентна соработка со ЕК и со сите релевантни партнери.
Што ќе добијат граѓаните и бизнисите
- Директно намалување на трошоците за телекомуникациски услуги при патувања во ЕУ.
- Поголема предвидливост и сигурност при користење мобилни услуги во странство.
- Подобра деловна конкурентност и полесен пристап до европскиот пазар.
- Повеќе можности за студенти, туристи и мали и средни претпријатија.
„Роаминг како дома“ е конкретна европска придобивка што ќе се почувствува во секојдневието: пониски сметки, полесна комуникација и подобра поврзаност, со јасен стратешки исчекор кон европскиот дигитален пазар.