Русија им забрани на уште 41 Канаѓанец да влезат на нејзина територија како одговор на санкциите воведени од Отава поради офанзивата на Москва во Украина, пренесе АФП.
Мерката е насочена кон „лидерите на организациите кои ги поддржуваат ултранационалистите во Украина и високи воени функционери“ и беше донесена како одговор на санкциите на Отава против Русија на 8 мај. Тие ги погодија руското Министерство за одбрана, воените лидери и претставници на бизнис заедницата, се потсетува во соопштението на руското МНР.
Неколку од Канаѓаните врз кои Русија воведе санкции денес се членови на организации поврзани со Украина, како што е Канадскиот украински конгрес, кој ја претставува украинската заедница во Канада пред владата.
На повеќе од 600 Канаѓани им е забранет влезот во Русија од почетокот на руската офанзива во Украина, потсетува АФП. На 19 мај, Москва објави затворање на московската канцеларија на Канадската радиодифузна корпорација (CBC / Радио Канада) и ги укина акредитациите и визите на своите новинари како одговор на забраната за дистрибуција на руски медиуми.
Отава, од своја страна, воведе санкции за повеќе од 1.000 физички и правни лица поврзани со Русија, Украина и Белорусија.
