Руската војска се враќа во своите гарнизони по вежбата на анектираниот украински полуостров Крим, каде распоредувањето на војниците ги подгреа стравувањата од инвазија на Украина, пренесе АФП.
Единиците од Јужниот воен округ, кои ги завршија своите тактички вежби во базите на полуостровот Крим, се враќаат со воз на своите постојани локации, соопшти руското Министерство за одбрана, цитирајќи руски агенции.
Руската телевизија прикажа снимка снимена во текот на ноќта на која се гледа како бескраен воз кој превезува тенкови го преминува мостот преку Керченскиот теснец, во чија изградба Русија вложи многу.
Мостот го поврзува Крим со територијата на федерацијата.
Москва веќе најави „делумно повлекување“ на своите војници стационирани во близина на границите на Украина со недели, што е знак на олеснување по двомесечните стравувања дека Русија ќе ја нападне земјата среде кризата меѓу Кремљ и Западот.