Руските сили ги запалија и телата на сопствените мртви во депонија во Херсон, до која пристапот беше забранет, пишува британски „Гардијан“.
Според локалните жители, на местото пристигнале руски камиони, кои донеле црни вреќи, кои потоа ги запалиле. Во исто време, воздухот беше исполнет со чад и ужасен мирис на запалено месо. Тие веруваат дека на овој начин Русите се ослободиле од телата на нивните војници загинати за време на тешките борби.
Локален функционер, кој сакаше да остане анонимен, изјави за британското издание дека украинските власти не ги интересира каде Русите ги закопале своите мртви, туку нивната цел била да ги пронајдат телата на измачените Украинци убиени и закопани во масовни гробници.
Некои веруваат дека палењето на телата на нивните војници е најлесниот начин за московските сили да ги отстранат труповите, бидејќи мостовите на реката Днепар биле премногу кревки за да ги поддржат камионите.
За изданието истото го велат и десетици други жители на Керсон, но украинските власти засега не ја потврдиле информацијата.
Украинската безбедносна служба верува дека телата на илјадници загинати руски војници неофицијално се фрлени бидејќи Кремљ ги регистрира како „исчезнати во акција“ во обид да ги прикрие своите загуби во војната во Украина. Ова го потврдуваат пресретнати телефонски повици на руски војници, цитирани од британското издание.
Украинското обвинителство вчера соопшти дека открило четири згради во Херсон каде, според обвинителите, руските сили вршеле тортура, пишува францускиот весник „Фигаро“, цитиран од БТА.
По ослободувањето на Херсон на 11 ноември, Киев упати неколку обвинувања против Москва дека нејзините сили извршиле тортура и воени злосторства. Во моментов нема реакција од руска страна.