Бројот на загинати во силниот земјотрес што рано денеска ја погоди јужна Турција може да достигне и до 10.000 луѓе, соопшти Геолошкиот институт на Соединетите држави (USGS).
Според неговите проценки, USGS рече дека има 47% шанси да достигне меѓу 1.000 и 10.000 луѓе, додека има 27% шанси да достигне помеѓу 100 и 1.000 и 20% шанси да достигне помеѓу 10.000 и 100.000.
Проценките на USGS доаѓаат од моделирање засновано на историски земјотреси во регионот, населението изложено на најсилно тресење и ранливоста на структурите во најтешко погодените зони.
„Веројатни се големи жртви и голема штета, а катастрофата е веројатно широко распространета“ , се вели во извештајот на USGS.
„Населението во овој регион живее во структури кои се исклучително ранливи на земјотреси, иако постојат некои отпорни структури.
Во извештајот, исто така, се проценува дека економските загуби најверојатно ќе бидат помеѓу 1 милијарда до 10 милијарди американски долари, што би можело да достигне до 2 отсто од турскиот БДП.
Според официјалните претставници и државните медиуми, досега се потврдени повеќе од 500 мртви, а повеќе од 3.000 други се повредени во Турција и Сирија.