На југот од виетнамската престолнина Ханој забрзано се гради огромен стадион со капацитет од 135.000 гледачи, кој по завршувањето би бил меѓу најголемите стадиони во светот. Објектот, кој првично беше познат како „Чонг Донг“, во јули годинава официјално го доби името „ВинФаст Стадиум“.
Изградбата започна во декември 2025 година, а рокот за завршување е поставен за јули 2027 година. Тоа е една година порано од првично планираниот рок. Стадионот нема да биде наменет само за фудбал, туку и за големи спортски натпревари, концерти и други меѓународни настани.
Објектот се простира на околу 73,3 хектари и е централен дел од големиот меѓународен спортски комплекс во јужниот дел на Ханој. Дизајнот е инспириран од традиционалните виетнамски бронзени тапани од цивилизацијата Донг Сон, по што стадионот претходно го носеше името „Чонг Донг“.
Се издигнуваат огромните столбови
По околу девет месеци работа, на градилиштето веќе се забележуваат масивни конструктивни елементи, меѓу кои и столбови високи речиси 80 метри. Тие се дел од сложениот систем предвиден за поставување на подвижниот покрив.
Стадионот ќе има целосно подвижен покрив, што е еден од најкомплексните делови на проектот. Во моментов се работи на сите четири трибини – А, Б, Ц и Д, а според планот, бетонската конструкција треба да биде завршена до крајот на 2026 година.
Потоа следуваат поставувањето на покривот и инсталацијата на останатите технички системи. Планот е конструкцијата на подвижниот покрив да биде завршена до мај 2027 година, а целиот стадион два месеци подоцна.
135.000 гледачи и огромен подвижен покрив
Со капацитет од 135.000 места, „ВинФаст Стадиум“ е проектиран да стане стадион со исклучително голем капацитет. Инвеститорот „Вингруп“ го претставува како објект со најголем капацитет во светот, иако официјалните податоци за капацитетот на стадионот „Рунградо“ во Пјонгјанг, кој се наведува со 150.000 места, се разликуваат зависно од изворот.
Покрај големиот број седишта, една од главните особености ќе биде целосно подвижниот покрив. За неговата изградба се предвидени челични модули тешки стотици тони, кои ќе се поставуваат со помош на хидрауличен систем.
Проектот предвидува и напредни технологии за функционирање на стадионот, вклучително и системи со вештачка интелигенција, паметна мрежа поврзана преку 5Г и технологии за управување со безбедноста и движењето на посетителите.
Дел од проект вреден 35 милијарди долари
Стадионот е само еден дел од многу поголем развоен проект предводен од „Вингруп“. Спортскиот град во околината на Ханој треба да зафаќа повеќе од 9.000 хектари, а вкупната инвестиција се проценува на околу 35 милијарди долари.
Паралелно со стадионот се гради и придружна инфраструктура. Меѓу проектите е и голема авенија широка 120 метри, која треба да го поврзе спортскиот комплекс со главните сообраќајници во јужниот дел на Ханој.
Прашање е колку често ќе биде полн
Големиот капацитет отвора и прашање за идната искористеност на стадионот. Фудбалот е популарен во Виетнам, но просечната посетеност на натпреварите во највисоката домашна лига во сезоната 2023/24 била под 6.000 гледачи. Поради тоа, само домашните фудбалски натпревари тешко би можеле редовно да наполнат објект со 135.000 места.
Инвеститорот затоа предвидува многу поширока употреба – од фудбалски натпревари и големи спортски натпревари, до концерти и други меѓународни настани.
Доколку изградбата продолжи според предвидената динамика, Ханој во јули 2027 година би можел да го добие еден од најголемите стадиони во светот, како дел од амбициозниот план за создавање голем спортски и забавен комплекс.