Поради неконтролирана сеча и нерасчистени гранки и дрвја, пристапниот пат до неколку ридски села во општина Студеничани е речиси непрооден веќе еден и пол месец. Жители од овој реон организираа протест и го блокираа патот во Драчево пред подружницата „Караџица“ на ЈП „Национални шуми“.
Во среда напладне, група мештани го блокираа патот во населбата Драчево, пред ЈП „Национални шуми“ – подружница „Караџица“, изразувајќи револт поради нерасчистениот материјал од сечата што го отежнува сообраќајот кон планинските села.
Што бараат жителите?
- Итно расчистување на исечените гранки и дрвја покрај патот.
- Санирање на оштетениот селски пат од тешката механизација.
- Контролирана и одговорна сеча без предизвикување штети.
- Разрешување на имотно-правните прашања за шумите.
„Излеговме на протести поради сечата на шумите и патот што ни го оштетуваат – целосно го уништија. Имаме многу проблеми, но накратко: шумите за кои имаме документи се сечат на нашите планини. Некои сè уште немаат регулирано имотно-правни односи, а некои имаат, но им велат дека шумите се државни“, изјави Фазли Етеми.
„Компаниите ги оставија гранките по патиштата и не го исчистија патот. Тешката механизација направи големи оштетувања. Луѓе на 40 километри од Скопје се без нормална комуникација – нема ни телефонска мрежа. Плус, со години се гради хидроцентрала и штетите се големи. Камиони од по 15 тони се качуваат горе“, рече Марио, учесник на протестот.
Градоначалникот на Студеничани, Ејуп Абази, ги посети демонстрантите и вети дека ќе алармира до надлежните институции за итно расчистување на патот и за контрола на идните сечи.
„Како општина немаме надлежност да ги контролираме „Национални шуми“ – за тоа постои Државен инспекторат за шумарство и ловство. Но, ќе побараме секоја сеча да се спроведува контролирано и без оштетување на патиштата по кои се движат граѓаните“, изјави Абази.
Од подружницата „Караџица“ велат дека, по барање на АРМ и Центарот за управување со кризи, се расчистувале гранките покрај патот за полесно поминување на тешки возила во итни случаи. Иако во зоната е забрането движење на камиони над 7 тони, одговорниот Влатко Груевски најави теренска акција за целосно чистење на трасата во рок од 20 дена.
- Очекуваат градежна механизација согласно тендерските постапки.
- Планирана рута: преку селата Собица, Мала Река и Алдинци.
По едночасовната блокада, демонстрантите се разотидоа. Тие најавуваат дека нема да се откажат од барањата сè додека не го остварат правото на слободно и безбедно движење кон своите села.