Шведска се враќа на традиционалните образовни методи со акцент на печатените книги, практиката на читање и пишување, додека ја намалува употребата на таблети и дигитални алатки.
Овој потег дојде откако политичарите и експертите изразија загриженост дека прекумерната дигитализација, вклучително и воведувањето таблети во предучилишните установи, доведе до пад на основните вештини на учениците, објави АП.
Шведската министерка за образование Лота Едхолм, која ја презеде функцијата во владата на десниот центар пред 11 месеци, рече дека на учениците им требаат повеќе учебници и дека печатените книги се важни за нивното образование.
Министерот минатиот месец најави дека владата сака да ја поништи одлуката на Националната агенција за образование да ги направи задолжителни дигиталните уреди во предучилишните установи. Таа оди чекор понатаму и има намера целосно да го запре дигиталното учење за деца под шест години.
Опаѓање на вештините за читање
Иако шведските студенти постигнуваат натпросечни резултати во читањето, рејтингот PIRLS („Напредокот во меѓународната студија за читачка писменост“) на шведските четвртоци покажа пад помеѓу 2016 и 2021 година.
Тие во 2021 година постигнаа просечни 544 поени, што е пад од просекот од 555 поени од 2016 година.
Сепак, Шведска сè уште е рангирана на седмото место во светот, изедначена со Тајван, за вкупниот резултат на тестот.
УНЕСКО упати итен повик
Експертите за образование посочуваат дека некои проблеми со учењето можеби се појавиле поради мерките воведени за време на пандемијата на коронавирус, како и поради зголемувањето на бројот на ученици мигранти на кои шведскиот не им е мајчин јазик, но исто така истакнуваат дека прекумерната употреба на уреди со екрани за време на училишните часови може да предизвика младите да заостанат по основните предмети.
„Постојат јасни научни докази дека дигиталните алатки го попречуваат, а не го подобруваат учењето на учениците“, рече угледниот институт Каролинска минатиот месец, коментирајќи ја претходната национална образовна стратегија која ја нагласуваше дигитализацијата на наставата.
„Институтот смета дека фокусот треба да се врати на стекнувањето знаење преку печатени учебници и стручноста на наставниците, наместо претежно бесплатни и непроверени дигитални извори“, велат од Институтот.
УНЕСКО објави и „итен повик за соодветна употреба на технологијата во образованието“. Извештајот ги повикува земјите да ги забрзаат интернет-врските во училиштата, но истовремено предупредува дека технологијата во образованието треба да се имплементира за никогаш да не ја замени живата настава предводена од наставници.
Селективна употреба на технологија
Во Стокхолм, главниот град на Шведска, 9-годишниот Ливеон Палмер, третоодделенец, им изјави на новинарите на АП дека му се допаѓа идејата да поминува повеќе време на училиште офлајн.
„Повеќе сакам да пишувам во училиште, на хартија, бидејќи едноставно се чувствувам подобро“, рече Ливеон.
Неговата учителка Катарина Бранелиус вели дека била многу селективна кога станува збор за користење таблети на час. Ги користиме во математика, имаме некои апликации, но не ги користиме за пишување“, рече Бранелиус.
Таа додаде дека на учениците помлади од десет години „треба време да вежбаат ракопис пред да почнат да пишуваат на таблети“.
Со цел да се надмине падот на вештините за читање, шведските власти најавуваат дека годинава ќе инвестираат околу 60 милиони евра за купување книги кои ќе бидат дистрибуирани до училишните библиотеки, а уште 42 милиони евра во следните две години за побрзо враќање на класични учебници до училиштата.
Сепак, не сите експерти таму се убедени дека враќањето на Шведска на традиционалниот пристап е единствено во најдобар интерес на студентите. Критикувањето на ефектите од технологијата „е популарен потег кај конзервативните политичари“, вели Нил Селвин, професор по образование на Универзитетот Монаш во Мелбурн, Австралија.
„Тоа е итар начин да се сигнализира посветеноста на традиционалните вредности“, додаде тој.