Повеќе од еден тон, односно 1.010 килограми небезбедна храна која се продавала како „здрава“, е уништена во голема акциска контрола на Агенцијата за храна и ветеринарство (АХВ). Инспекторите неделава „прочешлале“ стотици објекти и откриле низа неправилности, вклучително и продавачи кои работеле целосно на диво.
Казни од над 20.000 евра и нерегистрирани продавачи
Во текот на неделата биле спроведени вкупно 373 контроли низ државата кај субјекти кои се декларираат како објекти за производство и промет со здрава храна. Загрижувачки е податокот дека дел од нив воопшто не биле пријавени во институциите.
Со контролите е утврдено дека 14 оператори воопшто не биле регистрирани како оператори со храна во Агенцијата.
За констатираните прекршоци изречени се строги санкции:
- Издадени се 65 решенија и 19 опомени.
- Изречени се 44 парични казни.
- Вкупната вредност на казните изнесува 20.550 евра во денарска противвредност.
Што сè се продавало како „здраво“?
Списокот на утврдени недоследности кај операторите е долг и опфаќа сериозни прекршувања на безбедносните и хигиенските стандарди:
- Поминат рок и непознато потекло: Кај седум оператори е пронајдена храна со изминат рок на употреба, додека кај двајца се продавала храна со непознато потекло.
- Лоша хигиена: Девет објекти имале незадоволителни хигиенски и технички услови за работа.
- Проблем со декларации и вработени: Храната била несоодветно означена кај 18 продавачи, а дури кај 23 оператори вработените немале спроведено задолжителен здравствен преглед.
- Без дезинфекција и процедури: Двајца од операторите немале воспоставено процедури за Добра хигиенска и производствена пракса (или не воделе записи). Кај исто толку оператори не била извршена ниту задолжителната дезинфекција, дезинсекција и дератизација во објектите.
