Дополнителни 420м2 доби гинеколошката болница „Мајка Тереза“ во Чаир. Пред да преземат конкретни мерки надлежните институции, односно општината Чаир и Министерството за здравство, реновирањето го овозможија двете приватни компании Алма М и Ефтиниа Темпо99. Освен дополнителниот простор, сега болницата има на располагање нова опрема и две операциони сали. Директорот на болницата, Башким Исмаили вели дека досега во болницата „Мајка Тереза“ имало над 4.100 породувања, благодарение на професионалната работа на вработените.
-Тука се вршат гинеколошки зафати и сега отворивме и нов оддел, односно Одделот за ендоскопија. Пред сѐ, досега тука сме имале 4,100 породувања. Во моментов зголемување на пациентките се должи на болничкиот кадар кој е посветен на својата работа. Голема помош ни даваат и донаторите и пријателите на болницата кои се грижат за условите – вели Исмаили.
Директорот на компанијата Алма М, освен за училиштата, годинава помош понуди и на гинеколошката болница.
-До минатата година дониравме фондови низ училиштата, школувањето е многу важно, но разговарајќи со директорот на гинеколошката болница и вработените, одлучивме да инвестираме и тука. Идејата беше да му помогнеме на овој проект. Мотивот беше – ако градиме училишта, ќе градиме иднина, но да спасиме живот е најважното нешто. Поради тоа одлучивме да го финансираме проектот – рече Мухарем Муртезани.
Гинеколошката болница – Чаир, секоја година бележи раст на породувања од околу 10%. Уште од 2014 година, бројот на породувањата е зголемен за 40%. За реновирањето на овој оддел се потрошени над 6 милиони денари. Инаку, Специјалната болница по гинекологија и акушерство „Мајка Тереза“ – Скопје, за првпат е пуштена во употреба во 1965 и функционира како можност за здравствена заштита во областа на гинекологија, акушерство и неонатологија.
Репортер: Африм Јонузи