Светската здравствена организација (СЗО) препорачува да се преземат различни мерки против мајмунските сипаници, но не смета дека има причина за загриженост, јави ДПА.
„Ова не е болест од која јавноста треба да се плаши. Не е како ковид“, рече Силви Брајан, експерт на СЗО, на брифингот во Женева за земјите-членки.
Сепак, државите мора навремено да ги регистрираат заразените и да ги изолираат контактите. СЗО сугерира дека повеќето случаи на мајмунска сипаница ќе бидат благи. Сепак, бремените жени, децата и луѓето со слаб имунолошки систем се изложени на поголем ризик од развој на болеста.
„Имаме добар временски прозорец да го запреме ширењето на болеста сега“, рече Брајан.
Таа додаде дека не е јасно кои земји имаат залихи на вакцини против големи сипаници.
Сè уште нема специјално развиена вакцина против сипаница, но според СЗО, постоечките вакцини против сипаници се ефикасни околу 85 проценти против оваа болест.
Организацијата очекува бројот на случаи на мајмунска сипаница да продолжи да расте. Досега се идентификувани инфекции во повеќе од 20 земји, соопшти СЗО. Има вкупно околу 200 случаи на инфекција, забележува Асошиетед прес.
„Не знаеме дали ова што го гледаме сега е само врвот на ледениот брег или има уште многу неидентификувани случаи“, призна Брајан. Таа додаде дека се уште се нејасни причините за досегашниот развој на состојбата со ширењето на болеста.
Аргентина, пак, го регистрираше првиот потврден случај на мајмунска сипаница во Латинска Америка, објави Асошиејтед прес, цитирајќи владин претставник.
