Германските власти го обвинуваат 40-годишниот Мохамед Алфатих, жител на Бирмингам со британско државјанство, дека учествувал во подготовка на вооружени напади врз синагоги и други еврејски објекти во Германија и Австрија, објави „Дејли мејл“.
Според весникот, нападите биле планирани за втората годишнина од нападот на „Хамас“ врз Израел на 7 октомври 2023 година. Алфатих се соочува со постапка за екстрадиција во Германија, каде што обвинителството го опишува како високопоставен оперативец на „Хамас“ во странство, со врски со раководството на организацијата.
Во обвинителните наводи се тврди дека тој во јули минатата година презел пет огнени оружја во Берлин, ги пренел во Виена и ги сокрил во складиште. Германските истражители тврдат и дека снимил видеопорака во име на военото крило на „Хамас“, наменета за објавување по нападот.
Според обвинението што го пренесува весникот, британската полиција ја пронашла снимката на мемориска картичка од компјутер одземен од Алфатих.
Во рамките на истрагата биле приведени уште седум лица осомничени за припадност на мрежата. „Дејли мејл“ наведува дека заговорот бил спречен со помош на информации од израелската разузнавачка служба „Мосад“.
Алфатих работел како ИТ-консултант и живеел во Бирмингам. Според весникот, добил азил во Велика Британија во 2015 година, а британско државјанство шест години подоцна. Во текстот се наведува дека претходно бил телохранител на тогашниот лидер на „Хамас“, Исмаил Ханија, и дека е син на високиот претставник на организацијата Басем Наим.
Овие информации предизвикаа барања за проверка на постапката во која му биле одобрени азилот и државјанството. Поранешниот британски министер Зак Голдсмит побара темелна истрага за начинот на донесување на тие одлуки.
Постапката за екстрадиција била привремено запрена поради одделен судски процес во Велика Британија за напад врз извршител пред домот на Алфатих, по спор за неплатени казни за паркирање.
Во тој предмет тој е прогласен за виновен за нанесување телесна повреда, две дела поврзани со незаконско поседување нож и оштетување имот. Ослободен е од потешкото обвинение за нанесување телесна повреда со умисла, а казната треба дополнително да биде изречена.
Обвиненијата за планирање терористички напади се одделни од британскиот предмет и за нив допрва треба да се води судска постапка. Евентуалната екстрадиција зависи од одлуката на британскиот суд.
Британското Министерство за внатрешни работи порача дека нема место за луѓе што прибегнуваат кон насилство или помагаат во подготовка на терористички напади. Оттаму потсетија дека „Хамас“ е забранета терористичка организација во Велика Британија.