61-годишен маж од Њујорк почина откако бил насилно вовлечен во апарат за магнетна резонанца (МРИ), поради масивен метален ланец кој го носел околу вратот. Инцидентот се случил минатата недела во медицинскиот центар Nassau Open MRI во Вестбери, Лонг Ајленд, а жртвата била идентификувана како Кит Мекалистер.
Полицијата од округот Насау соопшти дека мажот неовластено влегол во просторијата додека биле во тек скенирања, носејќи ланец од приближно 20 фунти. Моќното магнетно поле на машината го повлекло мажот кон апаратот, предизвикувајќи сериозни повреди. Тој бил итно пренесен во болница во критична состојба, но им подлегнал на повредите следниот ден.
Сопругата на жртвата, Адриен Џонс-Мекалистер, изјавила дека таа била пациентот кој во тој момент бил скениран. По завршувањето на снимањето, побарала помош од сопругот за да стане, по што следел трагичниот настан.
„Го викнав Кит. Во следниот момент, магнетот го повлече со целата сила. Удри во машината. Само викав: ‘Исклучете ја оваа проклета работа!’“ – изјави таа низ солзи за News 12 Long Island.
Според експертите, МРИ апаратите користат екстремно силни магнети кои може да претворат дури и обични метални предмети во проектили. Националниот институт за биомедицинско снимање предупредува дека инвалидска количка, кислороден боксер или дури и клучеви можат да станат опасност ако се внесат во просторијата со активен магнет.
Слични несреќи, иако ретки, се евидентирани и претходно. Во 2001 година, шестгодишно момче загина кога метален боксер со кислород беше вшмукан во МРИ апарат во болница во Валхала, Њујорк.
Американската Администрација за храна и лекови (FDA) нагласува дека строгото спроведување на протоколите за безбедност – вклучително и проверка на метални предмети кај пациенти и придружници – е клучно за да се спречат вакви трагедии.
Во случајот со Мекалистер, истрагата е сѐ уште во тек, а центарот Nassau Open MRI засега не дава официјални коментари.