Тројца жители на Скопје се лишени од слобода во рамки на оперативната акција „Чистач“, поради сомнение дека уценувале жител на Делчево и му се заканувале по животот и телото, барајќи од него да им исплати 10.000 евра.
Полициски службеници од Одделот за криминалистичка полиција – Секторот за општ, насилен криминал и семејно насилство, во координација со СВР Штип – ОВР Делчево и СВР Скопје, извршиле претреси на две локации и ги привеле З.Б. (61), М.Б. (35) и Б. (43).
Акцијата била спроведена по оформен предмет во Основното јавно обвинителство Делчево за кривичните дела „уцена“ и „загрозување на сигурноста“, предвидени во член 259 и член 144 став 2 од Кривичниот законик.
Според пријавеното, осомничените му упатувале закани на жителот на Делчево, барајќи да им исплати 10.000 евра. Притоа, му се заканувале дека, доколку не ги исполни нивните барања, ќе објават компромитирачки материјали.
При претресите бил пронајден и нелегален пиштол „М57“, калибар 7,62 милиметри. По извршените проверки било утврдено дека оружјето потекнува од кривично дело „тешка кражба“, извршено на подрачјето на СВР Скопје.
Од полицијата информираат дека по целосното документирање на случајот ќе бидат поднесени соодветни кривични пријави.