Цените на нафтата денеска на меѓународните пазари останаа блиску до 80 долари, додека трговците чекаат сигнали од американската централна банка за зголемување на каматните стапки за да го проценат нивното влијание врз економијата и побарувачката.
На лондонскиот пазар цената на барелот по пладне беше речиси непроменета во однос на вчерашното затворање на трговијата и изнесуваше 79,92 долари. Позначителни промени немаше ниту на американскиот пазар каде барелот се тргуваше по 74,98 долари.
Претставници на ФЕД: Очекуваме дека ФЕД ќе мора да ги зголеми каматните стапки
Трговците денеска се фокусираа на американската централна банка, чиј претседател Џером Пауел треба да зборува на конференција подоцна во текот на денот и да ги претстави следните чекори за ограничување на инфлацијата со зголемување на каматните стапки.
Двајца функционери на ФЕД вчера изјавија дека очекуваат дека ФЕД ќе мора да ги зголеми каматните стапки од сегашните 4,25 на 4,5 отсто на 5,0 до 5,25 отсто за да го контролира растот на цените.
Претставниците на американската централна банка рекоа дека податоците за декемвриската инфлација доставени во четврток ќе им помогнат да проценат дали можат да го олеснат темпото на зголемување на каматните стапки на следниот состанок, на само четвртина процентен поен, по позначајното зголемување во 2022 година.
„Податоците за инфлацијата во декември би можеле да покажат во која насока ќе одат нафтените пазари“
„Податоците за инфлацијата во декември би можеле појасно да покажат во која насока ќе се движат финансиските и нафтените пазари во следните недели“, рече Тамас Варга од PVM.
Доларот ќе ослабне ако инфлацијата е помала од очекуваното, односно ако е поблага од декември, објасни Варга, а послабиот долар може да ја поттикне побарувачката на нафта бидејќи ја зајакнува куповната моќ на купувачите со други валути.
На почетокот на неделата, пазарите беа поддржани со одлуката на Кина, најголемиот светски увозник на нафта и втор по големина потрошувач, да ги отвори своите граници кои беа затворени три години поради Ковид.
„Оживувањето на кинеската побарувачка може да ги поддржи цените само во ограничен обем“
Во исто време, Пекинг го објави вториот круг квоти за увоз на сурова нафта оваа година, со што вкупниот обем на овогодинешниот увоз го зголеми за една петтина.
Но, аналитичарите предупредуваат дека оживувањето на кинеската побарувачка може да ги поддржи цените само во ограничена мера, задржани од забавувањето на активноста во глобалната економија.
„Со оглед на тоа што моментално сè уште се очекува закрепнување на потрошувачката, цената на нафтата најверојатно ќе остане ниска и ќе се движи во ограничен опсег“, според аналитичарите на Haitong Futures.
Организацијата на земјите извознички на нафта (ОПЕК) денеска објави дека цената на барел од нафтената кошничка на нејзините членки во понеделникот паднала за 1,42 долари, на 77,57 долари.