ТТК Банка АД Скопје издаде долгорочни должнички хартии од вредност, односно корпоративна обврзница, во вкупен износ од 1.000.000 евра. Обврзницата е издадена по пат на приватна понуда наменета за однапред познати купувачи, како што е наведено во официјалната одлука на Собранието на акционери на банката.
Според документот, вкупно 15 инвеститори, од кои 14 физички лица и еден институционален инвеститор, учествуваа во откупот на обврзницата.
Најголем поединечен вложувач е отворениот инвестициски фонд „КБ Инвест Балансиран“, управуван од КБ Инвест АД Скопје, кој купи обврзници во вредност од 150.000 евра, што претставува 15% од вкупната емисија.
По него следуваат неколку поголеми индивидуални инвеститори. Павлинка Трповска, Драгица Јовановска и Звонимир Ристоски вложија по 100.000 евра, обезбедувајќи по 10% од емисијата секој од нив.
Интересно е што меѓу купувачите е и Томе Волкановски, кој како претседавач на Собранието на акционери ја потпиша одлуката, а воедно и лично инвестираше 40.000 евра во обврзницата на банката.
Останатите инвеститори откупија помал број на обврзници, со вложувања кои се движат од 13.000 до 70.000 евра.
Издавањето на корпоративни обврзници е вообичаен начин на кој компаниите и банките обезбедуваат дополнителен капитал за финансирање на своите активности и зајакнување на својата капитална позиција.
