По утринскиот хорор во новата станбена зграда во Кисела Вода, каде станарите со бебиња во раце панично бегаа од пожар и експлозии, екипата на 4news.mk разговараше со жителите. На терен, сликата е загрижувачка, а револтот кај граѓаните расте од час во час.
Полицијата сè уште е на местото на настанот и врши разговори, но станарите бараат одговори од општината и изведувачите.
Траги на неодговорност: „Голи жици“ пред детска игротека
Она што најмногу ги згрозува жителите е фактот дека трагедијата висела во воздух со месеци. На местото каде што избувна пожарот, веднаш пред влезот, затекнавме целосно изгорен електричен ормар и јагленосан велосипед. Веднаш до пеплосаната инсталација се наоѓа детска игротека.
„Ова е трет пожар во истава зграда за само една година! Жиците со денови стоеја „голи“ и незаштитени на отворено, токму тука каде што секој ден играат нашите деца. Пријавувавме во Општина Кисела Вода, доаѓаа инспектори на терен, но сè завршуваше така – само со лист хартија и записник. Никој со прст не мрдна да го реши проблемот трајно“, револтирано сведочат станарите за 4news.mk.
Зградата во моментов е целосно без електрична енергија, а штетата на инсталацијата, на која претходно се изведувале некакви градежни работи, е огромна. Меѓу станарите владее неизвесност и страв дека нормализирањето на состојбата ќе потрае со недели, па дури и цел месец.
„Среќа во несреќа е што пожарот избувна во 5 часот наутро. Да беше преку ден, кога игротеката е полна со деца и кога тука е фреквентно, денес ќе зборувавме за жртви. Бараме итна истрага, лоцирање на кривична одговорност и од изведувачот и од оние кои ги потпишувале записниците без да ја проверат безбедноста“, порачуваат жителите.