Официјални лица во Газа рекоа дека Израел извршил воздушни напади врз или во близина на најмалку три болници денеска, дополнително нагласувајќи ја критичната состојба на здравствениот систем во палестинската енклава додека се обидува да се справи со илјадници повредени или раселени луѓе во Газа, пренесе Ројтерс.
„Израелските окупациски сили изведоа симултани напади врз неколку болници во последните часови“, изјави портпаролот на Министерството за здравство во Газа, Ашраф ал-Кидра, за телевизијата Ал Џезира.
Меѓу именуваните медицински установи е и најголемата болница во Газа, Еш Шифа, каде Израел вели дека Хамас има скриени командни центри и тунели, што Хамас го негира. Кидра рече дека Израел го нападнал дворот на медицинскиот комплекс во градот Газа и дека има жртви, но не наведе детали.
Израелската војска веднаш не го коментираше извештајот на Кидра, кој Ројтерс не можеше независно да го потврди.
Болниците во Газа се борат да се грижат за жртвите од повеќе од едномесечната воена кампања на Израел, чија цел е уништување на палестинската милитантна група Хамас, бидејќи медицинските материјали, водата за пиење и горивото за генераторите за струја се при крај.
Министерството за здравство на Газа соопшти дека 18 од 35 болници во Газа и 40 други здравствени центри не се во функција, или поради бомбардирањето или поради недостаток на гориво.
Палестинските медиуми денеска објавија видео снимка од Еш Шифа на која се прикажани последиците од израелското бомбардирање на паркинг каде што раселените Палестинци се засолниле. До телото на маж, кој е ставен на носилки, може да се види локва крв, јавува Ројтерс.