Шефовите на британското здравство предупредија дека не можат да ја гарантираат безбедноста на пациентите за време на штрајкот на возачите на брзата помош и болничарите закажан за денеска.
Во Англија и Велс ќе има штрајкови на возачите на брзата помош и болничарите. Нема штрајкови во Шкотска и Северна Ирска, а исто така и во делови од Источна Англија и Островот Вајт. Генерално, сепак, се очекува сериозно нарушување на услугите на Брзата помош, бидејќи таму каде што возачите на брзата помош и болничарите штрајкуваат, штрајкуваат и телефонските оператори, помошниците во итната помош и техничарите.
Времето за брза помош да стигне до пациент сега е двојно подолго од пред две години, многумина не сакаат ни да размислуваат што ќе се случи за време на штрајкот.
Околу 750 војници се повикани да ги заменат возачите на брзата помош и болничарите, но нивната улога ќе биде ограничена бидејќи нема да бидат испратени на критични повици и нема да пружат итна помош бидејќи не се доволно квалификувани.
Во писмото до премиерот Риши Сунак, Конфедерацијата за национално здравје, која ги претставува здравствените системи во Англија, Велс и Северна Ирска, рече дека постои „длабока загриженост меѓу здравственото раководство за нивото на штета и ризик што може да се случи кај пациентите“.
„Ова не е нешто што би го кажале лесно, но многумина не информираа дека не можат да ја гарантираат безбедноста на пациентите на денот на штрајкот“, се наведува во писмото.
Вториот 24-часовен штрајк на медицинските сестри беше одржан во вторник. Владата го одбива зголемувањето на платите од 19 отсто што го бараат синдикатите.