Кривичниот суд забрани управување и потпис на сметки на 17 фирми кои се опфатени со истрагата која неоадмна ја отвори Јавното обвинителство, а е поврзана со семејството Кармзови.
Мерката е впишана како „упис на промена“ за правниот субјект Друштво за производство, трговија и услуги „НЕТКОМ ПЛУС“ ДООЕЛ Струмица.
Според решението, против осомничената Зуле Каримова Василева од Струмица, се определуваат мерки на претпазливост – забрана за преземање на работни активности поврзани со управување на правни лица и забрана за дејствување како овластен потписник на трансакциски сметки на следниве правни лица: ММР Компани ДООЕЛ Струмица, НЕТКОМ ПЛУС ДООЕЛ Струмица, ДИАНИТА ДООЕЛ Струмица, САКАОВ-ТРАНС ДООЕЛ Струмица, ВЗВИ Компани ДООЕЛ Струмица, ВИНАС Текстил ДООЕЛ Струмица, АГРО КРМЗ ДООЕЛ Струмица, ФЕРОЦЕМ ПЛУС ДООЕЛ Струмица, КРМЗОВ-МР ДООЕЛ Скопје, АКТИКО Текст ДООЕЛ Струмица, ВИЛА ПАРК ДООЕЛ Струмица, ВАСИЛ ВК КОМПАНИ ДООЕЛ Струмица, ХАНТОНОС ДООЕЛ Струмица, АКТИКО Текст ДООЕЛ, КАМИЛКОМ СР ДООЕЛ Струмица, МИНТИКОС Текстил ДООЕЛ Струмица и КОНТИ Хром ДООЕЛ Струмица.
Во решението е наведено дека мерките ќе траат додека постои потреба, а најдолго до правосилноста на пресудата. Судот по службена должност на секои два месеца ја преиспитува потребата од нивно траење. Жалбата не го задржува извршувањето на решението.
Штетата што ѝ е нанесена на државата преку фиктивни зделки за поврат на ДДВ достигнува неверојатни 94 милиони евра, а зад операцијата стојат 15 фирми поврзани со семејството Крмзови од Струмица. Истрагата, која ја води Обвинителството за гонење организиран криминал и корупција, опфаќа и 23 физички лица, меѓу кои 4 сметководители и 8 инспектори од Управата за јавни приходи (УЈП).
Според обвинителката Верица Бержецка Крстева, фирмите склучувале фиктивни купопродажни договори за недвижности кои не биле ни во сопственост на продавачите. Простории се продавале и препродавале по вештачки надуени цени – и тоа по цени од 4.000 до 20.000 евра за квадрат.