На 30-ти овој месец започнува судењето против Стојанче Јовановски, обвинет за свирепо семејно насилство кое доведе до смртта на неговата сопруга Ивана и нивното малолетно дете.
Трагедијата се случи на 2 март, кога по серија физички напади и закани по животот, Ивана во состојба на безизлезност скокнала од шестиот кат заедно со детето.
Обвинителството го товари Јовановски за три тешки кривични дела:
- Наведување и помагање во самоубиство (најтешкото дело);
- Загрозување на сигурноста;
- Телесна повреда при семејно насилство.
Според правните експерти, иако за овие дела поединечно се предвидени високи казни, судот изрекува единствена затворска казна. Со оглед на тежината на случајот и преклопувањето на санкциите, минималната очекувана казна би се движела околу 7-8 години, додека пак максималната казна би се движела околу 15 години затвор.
Во обвинението се наведува дека Јовановски со години сурово и нечовечно постапувал кон својата сопруга, малтретирајќи ја психички и физички пред нивната ќерка. Кулминацијата се случила на денот на трагедијата кога, по брутален напад на јавно место и сериозни закани дека ќе ѝ го одземе детето, жртвата била доведена во состојба на тешка психичка вознемиреност.
Судењето ќе го води судијата Ивица Стефановски, кој веќе е познат на јавноста по водењето на предметот за убиствата на Вања Ѓорчевска и Панче Жежов.