Жртвите на репресијата на плоштадот Тјенанмен во Пекинг пред 33 години нема да бидат заборавени, изјави американскиот државен секретар Ентони Блинкен, цитиран од Ројтерс.
Во изјавата за годишнината, Блинкен го нарече задушувањето на продемократските протести „брутален напад“.
„Напорите на овие храбри луѓе нема да бидат заборавени. Секоја година им оддаваме чест и сеќавање на оние кои се бореле за човековите права и основните слободи“, рече американскиот државен секретар. „Нема да го заборавиме 4 јуни“, им порача тој на кинескиот народ и на оние кои продолжуваат да се соочуваат со неправда и бараат слобода.
На денешен ден, пред 33 години, кинески војници отворија оган врз продемократските протести на и околу главниот плоштад во главниот град. Секое јавно сеќавање на овие настани во Кина е забрането, забележува Ројтерс.
На редовната прес-конференција во четвртокот, портпаролот на кинеското Министерство за надворешни работи Жао Лиџијанг го повтори стандардниот став на Пекинг за репресијата. „Кинеската влада одамна дојде до јасен заклучок за политичкиот инцидент што се случи кон крајот на 1980-тите“, рече тој.
Денеска активистите ќе се соберат во тајванскиот главен град Тајпеј за да ја одбележат годишнината. Ова ќе биде единствен таков јавен настан во светот на кинескиот јазик, според Ројтерс.
АФП забележува дека темата за репресијата на Тјенанмен отсекогаш била табу во Кина. Хонг Конг беше исклучок до 2020 година, кога Пекинг наметна драконски закон за национална безбедност на специјалниот административен регион на Кина со цел да спречи какво било изразување на несогласување по големите продемократски протести во 2019 година.
Полицијата во Хонг Конг предупреди дека секој собир би бил нелегален и потсети дека учеството во неовластени собири е казниво со пет години затвор.
