Зоолошката градина во Алборг, на север од Данска, објави необичен апел на Фејсбук и на својата веб-страница: тие бараат од граѓаните донации од несакани домашни миленици, кои ќе им служат како храна на предаторите.
Во соопштението се вели дека зоолошката градина може да смести помали живи животни како што се кокошки, зајаци и заморчиња, кои се „важен дел од исхраната на нашите предатори – особено евроазискиот рис, на кој му е потребен цел плен сличен на оној што природно би го ловел во дивината“.
Во него се наведува дека доколку луѓето сакаат да предадат животни од различни причини, можат да донесат максимум четири мали животни истовремено. Потоа животните се еутанизираат од страна на стручен персонал, а нивните тела се користат за хранење на предатори.
„Во зоолошките градини, имаме одговорност да го имитираме природниот синџир на исхрана на животните – за нивната благосостојба и професионален интегритет. Ништо не се троши залудно – ние обезбедуваме природно однесување, исхрана и благосостојба на нашите предатори“, се вели во соопштението.
Зоолошката градина прифаќа и коњи високи до 147 см кои имаат важечки пасош за домашни миленици.
„Со години ги храниме нашите месојади со помал добиток. Кога чувате месојади, потребно е да им давате месо, по можност со крзно, коски и други делови, за да имаат што е можно поприродна исхрана. Затоа, логично е да користиме животни кои мора да бидат еутанизирани од различни причини на овој начин. Во Данска, оваа практика е вообичаена, а многу од нашите посетители и партнери ја ценат можноста да придонесат“, се вели во официјалното соопштение од зоолошката градина во Алборг.
Оваа практика не е невообичаена, животните што умираат во зоолошките градини или се отстранети од локалните популации понекогаш се користат за хранење на други животни.
Во 2014 година, зоолошката градина во Копенхаген предизвика контроверзии кога евтаназираше 18-месечен мажјак жирафа по име Мариус и го хранеше со неговото тело лавовите. Во тоа време, зоолошката градина објасни дека го сторила тоа за да спречи инбридирање, а онлајн петицијата со илјадници потписи не успеа да ја запре постапката.
Во 2023 година, зоолошката градина во Лајпциг закла 15-годишна машка зебра и со нејзиното тело ги хранела лавовите. Директорот во тоа време изјави дека се обиделе да најдат нов дом за животното, но не успеале.