Во разгорот на туристичката сезона, кога кон земјата пристигнуваат гости од целиот свет, работниците во угостителството и туризмот во Грција ќе одржат 24-часовен национален штрајк на 24 јуни, со планирани митинзи во Атина, Солун, Патра и уште неколку градови.
Штрајкот е најавен од ПОЕЕТ, Панелинската федерација на вработените во угостителството и туризмот, како дел од поширока синдикална акција во која учествуваат работници од неколку клучни сектори на грчката економија, меѓу кои градежништвото, прехранбената индустрија, малопродажбата и администрацијата во регионалните власти, објави грчкото издание Прототема.
Клучните барања на синдикатите се повисоки плати, посилен систем на јавно здравство и образование, како и поефикасна заштита на трудовите права. ПОЕЕТ соопшти дека штрајкот е изгласан едногласно во целиот сектор на угостителството и туризмот, а локалните синдикати организираат митинзи низ целата земја.
Во Атина главниот митинг ќе се одржи на плоштадот Канингос во 11 часот. Во Солун работниците ќе се соберат пред ЕФКА, главната агенција за социјално осигурување во Грција, во 10 часот и 30 минути. Во Патра митингот е пред Работничкиот центар, исто така во 10 часот и 30 минути. Очекувани се мобилизации и во други градови, меѓу кои Агринио, Јанина, Ираклион, Кавала, Кардица, Кожани, Ретимно и Хања.
Штрајкот се одвива во период кога рестораните, кафулињата, хотелите и другите угостителски дејности се под силен притисок, а сезонските работници сочинуваат значителен дел од работната сила. Можно е дел од објектите да работат со намален капацитет или привремено да не опслужуваат гости, што може да предизвика доцнења при пријавување во сместувањето, ограничена услуга во ресторани и изменети работни часови. Патниците се советуваат однапред да се информираат кај своите сместувачи и туристички оператори и да планираат дополнително време за патување и сместување.