Поранешниот одгледувач на шеќерна трска во Порторико е потврден како најстариот човек во светот во Гинисовата книга на рекорди, само неколку недели пред неговиот 113 роденден.
Емилио Флорес Маркез е роден на 8 август 1908 година во Каролина, Порторико, а во средата, кога беше објавен неговиот рекорд, тој имаше 112 години и 326 дена.
Растејќи, Маркез, кој е втор најстар од 11 деца, бил задолжен за многу домашни работи и се грижел за своите помлади браќа и сестри.
Како најстар син, Маркез помагал и на фармата за шеќерна трска на неговиот татко, почнувајќи од мала возраст, наводнувајќи ги растенијата и товарејќи ги во вагони, се вели во соопштението од Гинисовата книга на рекорди.
Тој продолжил да работи во земјоделството, што подоцна стана начинот на кој го издржувал своето семејство.
Маркез бил во брак со Андреа Перез 75 години, сè до нејзината смрт во 2010 година. Парот имал четири деца. Тој исто така има пет внуци и пет правнуци.
Сега живее во Рио Пиедрас, Порторико со своите две преживеани деца. Маркез, кој за малку ќе го изгубел слухот, инсталирал пејсмејкер кога имал 101 година – но тој е сè уште силен и е во добра здравствена состојба, се вели во соопштението. Неговиот клуч за среќен живот е „да се има многу љубов и да се живее живот без лутина“.
– Татко ми ме воспита со љубов, сакајќи ги сите. Тој секогаш ми велеше на мене и на моите браќа и сестри да правиме добро, да споделиме сè со другите – рече тој.