Живот

Предупредување до родителите: Десет производи за бебиња можат да бидат опасни по нивната безбедност

Предупредување до родителите: Десет производи за бебиња можат да бидат опасни по нивната безбедност

Не сите производи наменети за бебиња што се продаваат во продавниците се безбедни за употреба. Словенечката организација за заштита на потрошувачите (ЗПС), во соработка со европската организација ANEC и експерти за детска безбедност, објави список од десет производи чие купување не се препорачува поради можни ризици од повреди, задушување, падови и давење.

Според експертите, дел од овие производи се рекламираат како практични помагала за родителите, но нивниот дизајн или начинот на употреба може да претставуваат сериозна опасност за најмалите.

Меѓу производите за кои се предупредува се бебешките дубаци, вреќите за спиење со дополнителна тежина, вреќите за повивање без отвори за рацете, како и перниците што овозможуваат хранење на бебето без придржување на шишето.

На списокот се и ѓерданите за никнување заби, лентите за коса со затворена јамка, сензорните лулашки, помагалата за одржување одредена положба при спиење, седиштата за капење и гумените прстени за пливање што се поставуваат околу вратот на бебето.

Производите се продаваат, но тоа не значи дека се целосно безбедни

Од словенечката организација предупредуваат дека родителите често погрешно претпоставуваат дека секој производ достапен на пазарот претходно поминал строги безбедносни проверки.

Според нив, за голем дел од наведените производи воопшто не постојат посебни европски безбедносни стандарди, што значи дека тие можат да се продаваат без да бидат тестирани според единствени критериуми.

Дополнително загрижува фактот што дури и производите за кои постојат стандарди не се секогаш препорачливи за употреба.

Таков е случајот со бебешките дубаци и седиштата за капење. Иако за нив постојат одредени безбедносни барања, експертите предупредуваат дека нивната употреба и понатаму носи ризици.

Поради тоа, повеќе европски стручни организации побарале целосна забрана за продажба на бебешки дубаци.

Експертите предупредуваат на ризици од задушување, давење и повреди

Посебна загриженост предизвикуваат производите што се рекламираат како помагала за полесно заспивање, побрзо проодување или подобар развој на бебето.

Стручните лица посочуваат дека за многу од овие тврдења постојат малку научни докази, а во одредени случаи истражувањата покажуваат дека производите не ги даваат ветените резултати.

Најголемиот проблем, според експертите, е лажното чувство на сигурност што ваквите помагала можат да го создадат кај родителите.

Производите што овозможуваат детето привремено да биде оставено без непосредно придржување или надзор можат да бидат особено ризични, бидејќи несреќите кај бебињата често се случуваат ненадејно и без очигледни предупредувачки знаци.

Опасностите од задушување, давење или пад понекогаш не се придружени со плачење или други јасни сигнали дека детето е загрозено.

Затоа организациите за заштита на потрошувачите апелираат родителите внимателно да ги проверуваат производите пред купување и да не се потпираат исклучиво на рекламните ветувања.

Тие нагласуваат дека најважни се безбедното опкружување, соодветната опрема според возраста на детето и постојаниот надзор, особено при капење, хранење и спиење.

Пораката на експертите е дека високата цена, популарноста или присуството на производот во продавниците не се гаранција за неговата безбедност.

Ноќно студио

Најнова епизода

Дали системот реагира навреме? Ноќно студио со обвинителката Спасенка Андонова

Сите епизоди →
Имате вест, приказна или проблем? Пишете ни