Градоначалникот на Киев, Виталиј Кличко, во вторникот во видео порака предупреди дека „непријателот е на периферијата на главниот град“, додавајќи дека украинската војска „се подготвува да го брани Киев“.
„Нашите вооружени сили, силите за територијална одбрана, херојски се борат за нашата земја“, рече Кличко.
„Изградени се утврдувања и контролни пунктови на влезовите во градот. Ги молам сите да останат смирени. Не излегувајте без потреба надвор и останувајте во засолништа во случај на тревога“, додаде тој.
Масивен руски воен конвој долг 40 милји – составен од оклопни возила, тенкови, влечена артилерија и други логистички возила – стигна до предградијата на главниот град на Украина, Киев, според сателитски снимки од Maxar Technologies.
Во претходна видео порака, украинскиот претседател Володимир Зеленски рече дека одбраната на Киев е „клучен приоритет на владата“.
„Киев е посебен. Ако го заштитиме Киев, ќе ја заштитиме и државата. Ова е срцето на нашата земја и мора да продолжи да чука“, рече Зеленски.
Повторувајќи ги забелешките на претседателот, Кличко рече дека руските сили сакаат „да го земат срцето на нашата земја“.
„Ќе се бориме и нема да се откажеме од Киев“, изјави тој.